新手爸媽選購嬰兒用品前可參考　5項可不買的初生BB用品清單

唯妹即將出世，又是時候要入貨。睇返買過畀唯Ｂ的用品，加上集合呢幾年聽的評語，個人認為有幾樣產品是可以不用買，跟大家分享一下。

1. 放大鏡指甲鉗

▲ 放大鏡指甲鉗。（相片提供︰唯玩．唯樂．唯在學）

陪月姨姨、我及唯爸都一致認為放大鏡喺度係阻住嘅，放到咁大其實好難睇，比冇放大鏡仲危險啲。所以我哋由唯Ｂ初生已棄用，改用嬰兒剪刀，冇咁利，剪住隻迷你手指甲仔，新手爸媽都易控制啲。

2. 濕紙巾加熱器

我冇買呢樣，但我聽身邊所有買過嘅親戚朋友都話好後悔買咗，因為其實濕紙巾又唔係真係好凍，同埋我哋抹pat pat都係用棉花多，咁用暖水濕棉花就可以喇，唔使買部機。

▲ 唯媽在膠盒內放入乾棉花，再加食水，自己製濕棉花予BB使用。（相片提供︰唯玩．唯樂．唯在學）

喺屋企我都好少用濕紙巾幫唯Ｂ抹pat pat，因為濕紙巾唔係100%純水，有其他物質，長期用對皮膚都不太好，尤其是初生ＢＢ皮膚幼嫩，多用天然產品好啲。初時我哋都係每次用就拎個盆裝暖水，再濕啲乾棉花抹pat pat，但之後想方便大家，就喺$12店買咗呢個膠盒，放一大疊乾棉花入去，加食水，等啲棉花慢慢吸水後，用力壓走多餘水份就得，用法就好似濕紙巾咁，每次取一片。

3. 學步車

▲ 唯B用的學步車。（相片提供︰唯玩．唯樂．唯在學）

買過一部學步車畀唯Ｂ，佢興趣不大，而且未學識行的幼兒推住果部車未必識平衡，反而無助學行。佢識行唔係靠部車，其實只要有圍欄，佢就會扶住慢慢企起身，再慢慢學行。

4. 防跌枕

▲ 防跌枕。（相片來源︰網上圖片）

防跌枕目的是防止ＢＢ向後跌撞到後腦，不過ＢＢ唔會咁聽話一跌就只向後跌，佢哋跌嘅方向可以係向左／右／前／後，所以如果初學企同行，畀佢留喺軟墊上，跌都唔怕撞擊後腦，好過要佢揹住個枕頭嘛。

5. 沖涼網

▲ 沖涼網。（相片來源︰網上圖片）

本身我都以為同初生唯Ｂ沖涼會用到，但其實有個網喺度，係更加阻礙沖涼。首先，我唔會放個ＢＢ自己一個瞓喺網度，因為ＢＢ個身要浸住少少暖水先唔凍；第二，有個網喺度，我幫佢轉身洗背嘅話，要抱住佢嘅同時又要拎走個網，唔方便。所以，我只係用過一次咁多。

每件產品嘅出現當然都有佢嘅用途，而以上都只係我個人及身邊親友的意見，唔係話以上產品完全冇用，只係可以用其他代替或甚至慳返，希望幫大家慳返少少錢同位啦！

文章獲唯玩．唯樂．唯在學授權轉載。